Stek-stek Sukses

OLEH Wisran Hadi

“Kecek apak-apak nan manonton dari ateh pentas nan runtuah di tapi danau kembar minggu lampau, lah tigo kali TdS diadoan, sukses katigo kaliannyo. Lai indak curito paremjan main sabun di kamar mandi surang se tu Mas Sam,” tanyo Muncak ka Mas Sam nan handak pai ka Pariaman, Dek karano indak mungkin ka sinan jo bendi Muncak, tapasolah Mas Sam naik bendi ka stasiun kereta api di Simpang Haru.

Dalam pajalanan jo bendi tulah, batambah yakin Mas Sam, bahaso apo sajo nan dibuek pamarentah pasti sukses. Indak pernah pamarentah tu mambuek sesuatunya nan indak sukses doh. Sabab, kalau indak sukses, tibo urang KPK mamareso pambukuan bendaharawan.  

“Kok iyo sukses sagalo apo nan dibuek dek pamarentah mulai dari adu cingkariak, pacu jawi, pemilihan uni uda, pacu kuretangin, agak hati den memang paralu Mas Sam bagageh ka Pariaman. Palajari bana, baa mangko baruak bisa gadang tumbuangnyo kutiko bulan sadang panuah,” kato Muncak.

“O, iya ya. Benar juga itu Muncak. Tentu akan beda-beda juga ukuran pantat beruk itu besarnya kan? Wah, kalau itu dilomba-internasionalkan, akan bisa menggemparkan dunia!” sorak Mas Sam sambia bagandang paho samo surang.

“Itulah kecek den Mas Sam. Di ateh bendi den ko sagalo ide cemerlang, pikiran cerdas bisa tibo. Lai ka Mas Sam adoan pulo lomba bara gadang tumbuang baruak tu saroman TdS nan sukses tu? Buliah basiarak pulo pawang-pawang baruak dari India, Thailand, Vietnam, Cino, Japang, Malaysia, Brunai bahondoh pondoh naiak kureta api dari Simpang Haru ka Piaman,” solo Muncak sambia galak takakah.

“Niat saya semula ke Pariaman memang mau melakukan studi kelayakan untuk mengadakan lomba beruk memanjat kelapa. Tapi kalau Muncak memperkaya ide lomba panjat kelapa itu dengan kontes tumbung beruk, tentulah akan semakin tertarik dunia internasional kepada event-event budaya kita, ya kan?” kato Mas Sam.

“Apo kecek Mas Sam tadi? Budaya kita? Lomba tumbuang baruak bisa dikecek an sebagai event budaya Minangkabau? Ondeh Mas Sam. Jaan roman tu bana. Budaya Minangkabau ko beda jo tumbuang baruak Mas Sam!” hariak Muncak.

“Kukira sama,” baleh Mas Sam acuah tak acuah. Muncak tarabo.

“Samo? Baa jalan samo e !” tanyo Muncak.

“Dek banyak turis datang, samakin rami urang Minang ko manggaleh. Samakin banyak devisa. Itu kan sama dengan semakin bulan membesar, semakin membesar pula tumbung baruk itu kan? Ini sebuah analogi Muncak. Tidak perlu pula Muncak tersinggung dengan sebuah analogi,” kato Mas Sam sambia manapuak-napuak bahu Muncak.

“Kok analogi bagai lah, kok anakbincacak bagai lah, nan jaleh waden sangat tasingguang kalau Mas Sam manyamoan budaya Minangkabau ko jo tumbuang baruak. Mas Sam bapikie singkek bana mah. Stek-stek sukses! Ukuran sukses tu apo? Asa gubernur mangecek sukses, lalu Mas Sam sato pulo jadi beo, mangecek sukses. Kok roman tu caro Mas Sam, babaie juo utang Mas Sam tu kasudahannyo mah,” garutu Muncak.

“Tapi, apa pun yang diadakan pemerintah, gubernur dan bapak-bapak pejabat kita lainnya tidak pernah mengatakan tidak sukses kan? Begitu Muncak. Itu namanyao loyalitas bawahan kepada atasan. Apakah suatu kerja itu benar-benar berhasil atau tidak, bukan jadi persoalan benar. Gubernur bilang sukses, semua anak buahnya akan bilang sukses. Semua surat kabar akan bilang sukses, sesuai apa yang dikatakan gubernur. Akhirnya semua rakyat juga harus bilang sukses, walau sukses itu tidak terbukti. Kan begitu, ya ndak?” kato Mas Sam.

“Masyarakat awak kini ko memang alah S3 mah Mas Sam. Stek-stek sukses.***