Jaankan Cadiak, Bodoh Se Alun Lai

OLEH Wisran Hadi

“Mambuek pentas se indak pandai. Tu nak ka ba internasional-internasionalan lo! Nak bapariwisata-pariwisata pulo!  Gadang ota! Jaankan cadiak bodoh se alun lai! Lah jaleh bodoh, indak lo namuah baraja jo urang. Kini baa! Pentas runtuah! Untuang indak jangkang pejabat-pejabat nan sadang di ateh pentas runtuah tu. Untuang iduang Mas Sam se nan cungak diimpok dek tenda pentas tu,” kato Muncak baturo-turo sambia mamacik les bendinyo mamberangi Mas Sam.

“Kecek Mas Sam kalau sempat Mas Sam mati diiompok dek pentas runtuah tu ka dianggap mati syahid? Indak sabodoh tu bana Tuhan doh Mas Sam,” lanjuik Muncak.

Mas Sam tamanuang mandanga Muncak berang pakaro pentas runtuah. Banyak pejabat nan sadang bagandang pao di ateh pentas tu panik. Baa ka indak. Acara penutupan TDS sadang jalan, pentas runtuah. Mas Sam sato pulo ikuik runtuah samo jo pejabat-pejabat tu.

“Tapi kan bukan aku saja yang ada di pentas itu Muncak. Pakgub, pakwagub, pakbup, pak wapub, ya pokoknya pub-pubnya. Kok aku sendiri saja yang dimarahi,” kato Mas Sam mambela diri.

“Baa indak ka berang waden ka Mas Sam. Mas Sam nan taruih mahariak-hariak di pangka talingo den ko, bahaso TDS ko adolah kebanggaan Sumatera Barat! Kebanggaan kito! Kito sadang mambangkik batang tarandam! Kito akan go internasional! Turis akan bahondoh pondoh datang! Urang ka baduyun-duyun naiak bendi! Bendi ko adolah kendaraan antik milik sejarah! Macam-macam! Raso ka bananah lo anak talingo den mandanga kutubah Mas Sam. Kini, bakatubah bana lah Mas Sam. Kecek an ka urang banyak ko bahaso pentas runtuah bukan kesalahan panitia TDS. Tapi karano papan lapuak, kayu usang, sipaku bakarek, ayolah Mas Sam. Bakatubah lah pakaro pariwisata, pakaro go internasional tu baliak. Bangang! Lah jaleh hengak, disangko awak cadiak juo! Maso mambuek pentas se indak pandai! Bakorupsi lo anggaran mambuek pentas tu?” kato Muncak samakin naiak panhe bukaluangnyo.

“Muncak. Dengar aku. Soal kecelakaan bisa saja terjadi di mana-mana. Kebetulan kecelakaan itu terjadi sewaktu penutupan TDS tu,” kato Mas Sam.

“Apo? Kebetulan? Kebetulan kecek Mas Sam? Indak ado di ateh dunia nan kabatulan doh Mas Sam. Sadonyo bajalan sasuai jo apo nan alah digarihan dek Tuhan Allah. Lah jaleh kanai kutuak, dikecek an pulo kabatulan. Lai baugamo Mas Sam indak?” tanyo Muncak.

“Jadi, menurut Muncak bagaimana sebaiknya?” tanyo Mas Sam mambana.

“Kok iyo ka bainternasional-internasionalan, pelok i kakuih sagalo hotel, wese sagalo kantua dulu. Kalau lai bisa kakuih-kakuih tu indak hariang lai, itu baru lulus pelajaran pertamo. Sudah tu pelok i jalan. Jaan salamak paruik se manstop urang dek karano TDS-TDS tu. TDS ka lalu pukua anam sanjo, jalan lah batutuik sajak tangah hari. Karajo apo tu? Apak mande Mas Sam nan punyo jalan gadang tu, mako salamak paruik se maambek-ambek urang? Ado nan ka pai ka rumah sakik, malahiekan. Tapi diambek. Antah baa nasib urang tu kini. Nan kami rakyat ko lai mambaie pajak mah Mas Sam. Indak perai bagai kami bajalan ilie mudiak di jalan gadang ko doh! Jalan gadang ko hak rakyat mah Mas Sam,” kato Muncak. “Alah tu, pasti Mas Sam basipakak se mandanga kecek den mah. Kan iyo ndak?” kato Muncak.