Kaba Mamak si Hetong

Ditulis Kembali OLEH Anas Nafis

(Bagian 4)

Aso siang hari barisuak hari Jumaik - hari manjalang tangah hari - bakato Mamak Si Hetong:

"Barabab kito Rona ai - basaluang kito sabanta - saluang ka ubek litak - rabab ka ubek auih".

Tinggi randah bunyinyo saluang - gagok tigo bunyinyo rabab. Pipik tabang  jadilah inggok - aia mailia jadi baranti - mandanga rabab Si Rona – mandanga saluang Mak Hetong.

Bapantun Mamak Si Hetong - apolah buah pantunnyo:

            "Ka ditabang batang culan³⁹,

            Dioyak ka kida parumahan,

            Badarun panabangannyo,

                                               Anjo kito kito tiupkan bulan,

                                               To kito bilangkan musin,

                                               Bara do ka tatahan dinyo".

Kaba baraliah tantang nantun - sungguah baraliah sanan juo - baraliah bakeh nan gadih.               

Bakato Kasumbo Hampai:

"Apak Datuak Bandaharo - biai Rubiah Rando Kayo - mamak Datuak Rajo Angek. Den mandanga saluang urang - aia den minun sambiluan - nasi den makan raso sakam - tidua nan tidak talalokan - duduak nan tidak tasanangkan - mandanga rabab Si Rona – mandanga saluang Mak Hetong".

Bakato Rajo Nan Angek:

"Kamanakan Kasumbo Hampai - kununlah Mamak Si Hetong - mungkonyo pandai basaluang - saluangnyo ka ubek litak. Kununlah Si Rona Pinang - mungkonyo pandai barabab - rababnyo ka ubek auih. Sabab minun tiado makan tiado - guli satangkai panghidupan - aia sagaluak nan di minun - ka a di kau Mamak Si Hetong nan tun.

Nak den tatoklah galanggang - bago sahari urang rami - bago sabingkah tanah  sajo - ka langik buruang den lapeh - ka darek kulansiang⁴⁰ pai - ka lauik biduak baranang. Sutan nan mano di hati kau - rajo nan mano ka dijapuik - asa jan Mamak Si Hetong".

Manjawab Kasumbo Hampai:

"Kok mamak bunuah den ka mati - mamak jua den ka jauah - mamak gantuang den ka tinggi - bago sutan mamak jangkau - bago rajo mamak bao - asa indak Mamak Si Hetong. Tak dapek tu Mamak Si Hetong - banang satuka lawan lihia - tabiang tinggi hamburan den - rencong Aceh lawan dado - nak pueh hati mandeh kanduang - datang nan elok buruak juo".

     Di hari sahari nantun - hari tagelek tangah hari - sadang kanyang-kanyang pipik - sadang litak-litak tulang - sadang bunta bayang-bayang - bawari Kasumbo Hampai:

"Biai Rubiah Rando Kayo - bapak den Datuak Bandaharo - kok bapantun den sabuah,

      

                                                Den indang tidak taindang,

                                                Den tampih batambah luluah,

                                                Den kirai badadak juo,

                                                Aden rintang tidak tarintang,

                                                Den pujuak batambah rusuah,

                                                Mak Hetong taragak juo".

       

Painyo ka biliak dalam - malantak peti mangewang - babunyi puputan kaliang - tabukak peti nan gadang - diambiaknyo urai satahia - dibaonyo ringgik saratuih - ka baka anyo bajalan - manuruik akeh Mak Hetong.

Ringgik disimpan ka puro - urai disimpan ka pinggang - bajalan ka tangah rumah.

Bakato Kasumbo Hampai:

"Mamak den Rajo Nan Angek,

                                                Mamak patah io tapatah,

                                                Dirangkuah baduo-duo,

                                                Mamak tagah io tatagah,

                                                Mandacua den pai juo,

ka rumah Si Rona Pinang - ka akeh tuan Mak Hetong".

Tagaknyo ka pintu gadang - maadok lalu ka halaman - sanan bapantunlah awaknyo:

                                                "Tinggi malanjuiklah kau batuang,

Tidak den tabang-tabang lai,

Tingga mancaguiklah kau kampuang,

Indak ka den ulang-ulang lai.

Elok nak tabuang samiang⁴¹ - gadih nak nyik sayo sajo - nak pueh ati mandeh kanduang".

Bajalan turun nan gadih - talenggang rumah nan gadang - tagendeang anjuang nan tinggi.

Manangih Kasumbo Hampai:

"Kabau bantiang tinggalah tingga – urang dangan tinggalah angkau - sawah ladang tinggalah angkau - ambo bajalan anyo lai".

Hari sadang tangah hari - bajalan Kasumbo Hampai - salenggang duo layuaknyo - tapijak samuik haram mati - tataruang alu patah tigo - ka suok si ganjua lalai⁴² -  ka kida si ganjua luluah - ka suok tampan manganai - ka kida tampan marusuah.

Alah sarantangnyo bajalan - alah duo rantang nyo bajalan - lah dakek ampia ka sampai - ka dangau Si Rona Pinang.

Tibo awaknyo di sinan - bakato Si Rona Pinang:

"Kak ai Kasumbo Hampai - mangalah kakak kamari - nan tak tau dikayo awak - tak tahu dielok awak. Awak ambo urang misikin - bansaik nan ukan ulah-ulah - minun makan ambo lai tiado - abih tahun baganti tahun - abih musin baganti musin - guli satangkai panghidupan - aia sagaluak nan dimakan. Mangalah kakak kamari - cacek kakak batukuak-tukuak - hino kok batambah-tambah - sabab bapak den panjua pada - mandeh den panjua sadah.

Cacek kok datang ka den - dangakan banalah dek kakak,

                                                Den tutuah batang maransi, 

                                                Den ambiak paga samaian, 

                                                Lah jauah Mamak Si hetong kini, 

                                                Lah ka Tiku Pariaman.

Lah ka Sintuak Lubuak Aluang - lah ka Solok ka Salayo - lah ka Kubuang Tigo Baleh - ka kualo Banda Mua - lah ka piso-piso anyuik - lah ka sirangkak nan badangkuang. Sajak kakak amun pacek - talalu laraik sakali.

Kakak den Kasumbo Hampai - kok baitu bana janyo den - Insya Allah sananglah hati den. Kakak kok ka naiak dangau - gutialah daun daulu - ka paaleh kain  kakak - sabab lantai baabu-abu - palupuah basarok-saroh. Ikolah ruponyo pakai - jan gadang kakak marugi".

Lah naiak Kasumbo Hampai - ka rumah Si Rona Pinang - lah bangun Mak Hetong tidua.

Bakato Mamak Si Hetong:

"Diak kanduang Si Rona Pinang - kok tidua usah kau lalok - makan guli usah kau kanyang - minun aia usah kau sajuak.

Awak den ka pai bajalan - ka manarimo upah urang - ka mancarikan pungguang tak basaok - kapalo nan tak batukuik.

Tutuik pintu arek-arek - jambolah lapiak daun pua - talatak di ateh pagu - usah kau tasintak-sintak - manjalang awak den baliak".

Manjawab Kasumbo Hampai:

"Tuan ai Mamak Si Hetong - jan tuan pai manggaleh - to kito pulang ka kiun - ka Ulak ka Tanjuang Bungo - ka bawah anduang nan gadang⁴³.

Asa lai amuah tuan pulang babaliak - kabau bantiang bulek anjik tuan - rumah gadang anjik Si Rona. Sabab kato den lah talampau - lah maamun lah mancacek.

Tapi samaso kini nangko - lah tau dilaku-laku - lah pandai babaso-baso - bago sacamak duo camak - bago salingkuang jo nagari. Kok katidiang ambo pareh - sukatan amuah ambo lilik - to kito babaliak suruik".

Gayuang haram ditangkihnyo - kato nan tidak dijawabnyo.

Dek mudo Mamak Si Hetong - anyo bajalan turun sakali. Baru tibo anyo di halaman - bakato awaknyo akeh Si Rona:

"Tungkeklah pintu Rona - kunci tagok-tagok".

Bajalan Mamak Si Hetong - Kasumbo Hampai manuruik di balakang.

Bakato Kasumbo Hampai - bakato sambia baibaraik:

"Tuan ai Mamak Si Hetong,

      

Bao tambilanglah di tuan,

Ko den bao pangkua pulo,

Bao hilanglah di tuan,

Ko den bao timbua pulo".

Kununlah Mak Si Hetong - nambeknyo bahanti - mancaliak suruik lai tiado. Bajalan juo awaknyo - nan gadih manuruik di balakang. Bak ka jauah anyo dakek - bak ka dakek anyo jauah.