Apo Nan Kadikorupsi Dek Kusie Bendi

OLEH Wisran Hadi

“Kalakuan anak-anak kini ko macam-macam,” kato Muncak mambukak curito kutiko Mas Sam lah duduak di ateh bendinyo.

“Macam-macam bagaimana, Muncak?” tanyo Mas Sam.

“Anak-anak den tu ha. Nan bungsu kalau diagiah balanjo sikola nyo tarimo jo gadang hati, minta tarimo kasiah. Tapi nan tuo taruih se mangecekan pitih balanjonyo kurang,” jawek Muncak.

“Biasa hal itu Muncak. Setiap anak punya bawaan masing-masing,” komentar Mas Sam.

“Kapatang ko tarangah bana den dek si bungsu. Katiko den labiahan balanjonyo saribu dari nan biaso, inyo heran mancaliak den. Baa kok balabiah balanjo awak hari ko yah, tanyonyo. Den kecekan, tarimo se lah, sangajo ayah labiahan tumah. Untuk ekstra. Ayah lai dapek tambahan rasaki stek, jawek den,” kato Muncak manjalehan.

“Nah, lalu?” desak Mas Sam.

“Indak baranti-ranti inyo manyalidik i baa kok balabiah inyo diagiah pitih.”

“Kan bagus itu,” jawab Mas Sam. “Artinya si bungsu sangat teliti dengan pemberian yang diterimanya walau dari ayahnya sendiri. Anak-anak seperti itu kalau sudah dewasa akan hati-hati sekali menerima uang dari orang lain. Bahkan, anak-anak seperti itulah yang diperlukan untuk masa datang. Apa yang dilakukannya adalah cikal bakal dirinya untuk tidak mau menerima sogok. Tidak mau menerima sesuatu yang tidak jelas sumbernya. Itulah pendidikan anti korupsi yang paling baik,” kutubah Mas Sam serius.

“Iyo, tapi waden kawalahan manjawek tanyonyo. Apo alasan ayah mangko dilabiahan balanjo awak dari nan biaso? Dari ma ayah dapek pitih labiah? Bara sewo bendi ayah sahari? Nan biaso pitih ayah kurang-kurang, kini dapek maagiah awak pitih labiah? Kan elok ditabuangan untuk persiapan kalau ayah memang indak bapitih bana nantik? Ampun den ka anak bungsu den tu. Saroman waden ko lah mangicuah pitih urang atau lah macilok pitih urang. Saroman maadok i jaksa anti korupsi pulo waden dek ulah si bungsu tu,” kato Muncak.

“Memang Muncak repot menjawabnya, tetapi anak seperti itulah yang dapat mencegah bapaknya melakukan korupsi. Seandainya Muncak jadi pejabat, lalu bawa uang setumpuk pulang, pasti si bungsu akan mengusut darimana uang itu datangnya. Kan hebat! Ada petugas anti korupsi yang selalu didekat Muncak. Akhirnya Muncak jadi hati-hati dengan uang,” jelas Mas Sam.

“Mandenyo baitu pulo. Labiah se saketek pitih den bao pulang, langsuang nyo tanyo dari ma datang pitih tu. Dalam hal korupsi, saroman bana anak jo induaknyo. Lah den kecek an ka mareka tu, apo nan ka dikorupsi dek kusie bendi,” kato Muncak.

“Istri dan anak seperti itulah yang sangat diperlukan bangsa ini,” balas Mas Sam.

“Iyolah Mas Sam. Takana diden, apo iyo lah patuik pulo kusie bendi ko pakai pambukuan pitih masuak pitih kalua saroman urang bank?” tanyo Muncak.***