Urang Nan Maliang Minyak, Kusie Bendi Nan Disuruah Bapikie Maatasinyo

OLEH  Wisran Hadi

Gadang bana hati Muncal pagi ko. Sambia badendang-dendang ketek, inyo taruih mamacu bendinyo ka arah kampuang Jao. Mas Sam heran juo stek, baa kok kusie bendi nan surang ko agak lain kalakuannyo dari minggu-minggu nan taralah. Maninggaan parangai inyo ndak?         

“Gadang bana hati Muncak pagi ko mah. Baa? Manang lotre? Dapek minantu?” tanyo Mas Sam nan taakuak-akuak duduak di ateh bendi tu.

“Kini baru taraso manfaat bendi.  Waden indak paralu bensin, premium, solar apolai pertamak. Kudo den cukuik diagiah makan rumpuik sagarondong, dadak sabelek, sagu sakapiang. Kini baa raso badan urang-urang nan baoto tu. Bensin naiak. Subsidi ditarik,” jawab Muncak.

“Sabananyo kan awak nan banyak punyo sumber minyak. Baa mangko ayam di lumbuang bisa mati kalaparan?” tanyo Mas Sam mamanciang.

“Minyak mantah tu awak nan punyo. Nyo jadian bensin dek urang. Awak bali pulo bensin tu, labiah maha daripado minyak nan awak jua. Tantu iyo tekor se awak taruih. Alun lai minyak nan ilang tangah jalan. Kabanyo disaludupan urang awak pulo ka nagari lain.  Awak ko memang lah handia sajak dulu. Sudahlah bengak, pamaliang pulo!” kata Muncak dengan suara tinggi.

“Jadi baa lai Muncak? Bagaimana sebaiknya mengatasi persoalan kenaikan BBM ini?” tanyo Mas Sam jo bahaso nan campua baua.

“Ka urang-urang nan lah digaji gadang tu lah tanyoan, manga batanyo ka waden. Mereka digaji kan untuk maurus bebeem tu. Kok indak talok, gaji waden. Buliah den pikiekan pulo bebeem tu. Baa Mas Sam ko? Urang nan bengak, urang nan maliang minyak, kusie bendi saroman den ko nan di suruah bapikie maatasinyo.”

“Tentu Muncak juga punya pendapat, bukan?” umbuak umbai Mas Sam

“Pandapek den? Turuikan kecek presiden. Hemat bebeem. Ko indak. Gaji dapek, oto dapek, minyak perai. Bahemat saketek sajo indak namuah. Nyo sangko minyak tu apak mandenyo nan punyo!”

“Apa lagi pendapat Muncak?” tanyo Mas Sam mamanciang lo liak.

“Baa kok pamarentah indak talok mambali pabrik untuk menjadikan minyak mantah tu jadi bensin. Nan lain bisa dibalinyo. Manga pabrik tu indak?”

“Seperti kata Muncak tadi juga. Semua itu karena kita bengak! Ya, kan? Bengak kan? Tapi Muncak, orang asing itu tidak mau menjual pabrik seperti yang Muncak inginkan. Supaya kita selalu tergantung pada mereka. Ini masalah politik, strategi ekonomi.”

“Antah, muak den! Mambali oto samaha tubo lai talok. Mambali pabrik untuk maolah minyak indak. Jadi, apo sajo karajo urang pertamina tu, ha? Untuk manaik-naiak an harago minyak se?”

“Muncak. Kenaikan harga minyak ditentukan oleh DPR dan Pemerintah,” jawek Mas Sam serius.

“Nan kusie bendi dapek apo?  Kanai usie-usie se taruih?” garutu Muncak samo surang.