Bendi Muncak Bertaraf Internasional

OLEH Wisran Hadi

Iko kan rasio, sabananyo Muncak tu labuiah tapek disabuik tukang cimeeh daripado kusie bendi. Cubolah caliak. Minggu pagi ko Muncak lah manambang lo baliak. Pakai dasi, jas. Dalam bak muko bendinyo basusun-susun boto bir, spirt, cocacola, spiritus jo galeh-galeh sloki nan ketek-ketek. Di tonggak tenda bendi lah dipasang kipeh angin ketek-ketek. Ado pulo tissue sakotak bagantuangan di atok tenda. Dari tape recordernyo tadanga suaro-suaro cewek-cewek manyabuik an kato-kato; “welkam”, “ahlan wasahlan”, “sayonara”, “honda”, “fujimoru”, “merapi”, “singgalang”, “lembah anai”, “baruak mamanjek karambia” dan babagai-bagai kato lainnyo.

Lah hampia satangah hari Muncak manambang, nan panumpang indak surang juo nan naiak. Paniang Muncak. Kutiko lah baragak ka pulang, tibo Mas Sam. Langsuang Mas Sam naiak bendi tu.

Takekeh galak Mas Sam mancaliak apo nan dibuek Muncak. “Kalau begini dekorasinya, tentulah bendi ini bertaraf internasional. Ya kan kusie?” tanya Mas Sam sambia galak bagumam.  

“Memang baitu bana nan den mukasuik Mas Sam. Kini sagalonyo bertaraf internasional. Bendi den kapatangko lah dapek lo sertifikat ISO 2020. Itu artinyo, urang dunia lah maakui bahaso manajemen bendi den ko lah samo jo manajemen transportasi dunia lainnya. Kan lai indak salah waden kalau bendi den kini bertaraf internasional, yo ndak?” kato Muncak mintak dukungan.

“Itu sebabnya Muncak sebagai kusir bendi modern mulai memakai jas dan dasi? Muncak, Muncak. Kita sudah diperbodoh-bodoh orang,” kato Mas Sam.

“Dipabodoh baa?” tanyo Muncak agak tarabo.

“Coba. Kalau mau dianggap bertaraf internasioal, kita harus pandai berbahasa Inggeris, harus pakai jas dan dasi, harus makan KFC, Pizza Hut, cocacola, spiritus, dan lainnya. Apa memang begitu maksudnya bertaraf internasional itu?” tanyo Mas Sam.

“Waden indak paduli Mas Sam. Nan penting bertaraf internasional. Sikola musti bertaraf internasional. Baralek musti bertaraf internasional,” kato Muncak.

“Apa Muncak tahu pasti apa maksudnya bertaraf internasional itu?” tanyo Mas Sam.

“Tahu den. Tahu. Awak ko musti saroman bule-bule tu pulo ha. Iduik awak, bahaso awak, caro pergaulan awak, apo nan nyo makan awak makan pulo. Sagalo nan dibuek dek bule-bule tu adolah internasional. Awak kini sadang manjadi internasional. Ah, lah katinggalan Mas Sam komah,” kato Muncak.

“Kalau begitu, tentu banyak orang yang akan menjadi penumpang bendi bertaraf internasional ini. Tapi kenapa bendi Muncak ini bersih saja sampai sekarang. Tidak ada yang berani naik bendi lagi ya?” tanyo Mas Sam.

Muncak takekeh galak, manggalak an badannyo surang. “Nan salah waden juo Mas Sam. Lai ado urang ka naiak tapi sabalun naiak den katokan ka inyo; dollar yes, rupiah no. Ke sorga pakai Riyal, rupiah silahkan ka narako,” kata Muncak.

“Kalau begitu bendi Muncak ini tidak hanya bertaraf internasional, tapi sudah bertarif internasional,” kato Mas Sam. ***