Babendi-bendi Ka Sungai Tanang

OLEH Wisran Hadi

Tari jo lagu Babandi-bandi Ka Sungai Tanang kini lah tingga sejarah. Dalam kenyataannnyo, nan bendi samakin hari samakin samakin kurang, tari Babandi-bendi lah baganti jo joget baruak tabaka ikue, tari pijak kaco pacah. Namun samantangpun baitu, Muncak, pewaris tunggal budaya Minang, pemilik bendi jo sijarahnyo, pemilik kudo dan sekaligus kusie indak indak namuah inyo mangganti bendinyo jo angkot, ojek atau bus kota.

Kok disigi-sigi bana, nan naiak bendi tu kini adolah urang-urang bakepeang, urang-urang nan pai raun kaliliang kota, urang asing. Tapi labiah banyak urang-urang nan banostalgia. Maota di ateh bendi, buliah manyumpah-nyumpah, indak ado urang nan ka berang, labiah bebas urang maota di ateh bendi daripado maota di lapau. Jadi kok tamaha bana seo bendi, kalabihannyo ado; ado kebebasan mengecek di ateh bendi. Memang, manuruik Muncak, kebebasan tu memang maha baienyo.

Tahun baru duoribu sabaleh ko Muncak taruih juo manambang. “Manambang tahun baru!” soraknyo sambia galak takakah-takakah mancaliak Mas Sam tagak tapi jalan manunggu bendinyo lalu.

“Kok kapatang indak manambang?” tanyo Mas Sam jo logat Jawa nan taba-taba manyabuik huruf b jo p nyo.

“Kecek Mas Sam kusie bendi indak buliah perai kutiko hari gadang?” kato Muncak. “Mas Sam. Mulai tahun ko, waden cuma manambang satiok hari Minggu se. Sabab, di hari minggu tu banyak urang nak pai bajalan-bajalan jo bendi,” sambuang Muncak.

“O, jadi Muncak mulai duoribu sabalah ko jadi kusia bendi di hari libur sajo yo? solo Mas Sam.

“Waden musti manambang di hari minggu untuak manjadi saingan paja-paja nan bakapik-kapiak di ateh motor tu ha!. Hantu gadang! Jangak! Nan gadih jo bujang labiah suko manyeo motor, gonceang baduo, bakapik-kapik. Nan dikapiknyo antah iyo lakinyo atau indak, indak lo jaleh diden doh,.” jawek Muncak.

“Iyo baitu pergaulan urang kini, Muncak. Soal bini awak atau indak, soal laki awak atau indak, nan jaleh, nan bisa dikapik, dikapik juo baru lai. Lari motor bialah lambek asa lai paluak samakin arek,” kato Mas Sam.

“Jadi manuruik Mas Sam lah rusak bana pergaulan urang mudo awak kini?” tanyo Muncak mamanciang persoalan.

“Tadanga di den, urang gaek-gaek Minang taruih se mangecek pakaro adat basandi syara, syara basandi Kitabullah. ABS-SBK. Tapi nan mudo tatap juo bapaluak-paluak bagonceang di ateh motor,” kato Mas Sam.

“Nan ABS-SBK tu kan lah ba seminaran bagai mah Mas Sam. Mulonyo ka kongres, tapi kudian lah jadi seminar se,” jawek Muncak.

“Lho, kok diubah. Indak bakepeang panitia mambaie urang untuk kongres tu?” tanyo Mas Sam.

“Kepeang banyak, tapi pambaie kusie bendi kongres nyo tu nan maha,” jawek Muncak galak bagumam.***