CARITO RANDAI SANTAN BATAPIH: Ide Carito dek Kabun Rangkai Batuah (Alm)

Disusun Baliak Dek Musra Dahrizal Katik jo Mangkuto

(BAGIAN 9-Tamaik)

Keterangan

Sabalun anak randai duduak, Aluran Dang Dami Sutan, lah barado dalam lingkaran, nan diri Santan Batapih, barado dilua lingkaran, karano sadang dihalaman, si Santan lansuangnyo bakato, ka diri Dang Dami Sutan.

Santan Batapih (123-13)

O...Uncu Dang Dami Sutan

Jawek lah kato gak sapatah

Santan Batapih dihalaman

Lai koh uncu ateh rumah

Dang Dami Sutan (124-13)

Santan Batapih nan budiman

Diak kanduang balahan diri

Usah lamo tagak dilaman

Itu cibuak basuah lah kaki

Santan Batapih (125-13)

Kalau baitu kato uncu

Ambo tingkek janjang batanggo

Karumah ambo daulu

Nak dapek manyabuik kato

Hap ...Tah ...Tih ....

Keterangan

 Untuak masuak Santan kadalam, katangah lingkaran anak randai, dianta jo tapuak buliah, jo galombang silek bulih juo, satibo si Santan di dalam, anak randai alah duduak, Dang Dami Sutan lah bakato.

Dang Dami Sutan (126-13)

Diak kanduang Santan Batapih

Bungo satangkai ibu bapo

Siriah sakapua nan lah abih

Raso lah patuik bacarito

Salaruik salamo nangko

Indak ado Santan nan datang

Kok iyo ado nan taraso

Elok lah Santan bari tarang

Santan Batapi (127-13)

Kalau baitu bunyi kato

Tanyo aciak Dang Dami Sutan

Dek ujuik aciak batanyo

Ambo ka luruih mangatoan

Nan takana di dalam hati

Tapikia dalam kiro-kiro

Ambo bakandak buruang nuri

Itu sabab ambo dek tibo

Tanyo aciak alah dibari

Suko rila aciak andaknyo

Buruang ka ambo baok kini

Iyo ka budi caniago

Ba apo pikiran aciak

Dang Dami Sutan (128-13)

Santan Batapih nan budiman

Kok hanyo saburung nuri

Indak guno adiak rusuah-an

Di ambo kandak kababari

Tandonyo kito badunsanak

Samo ba ayah ka rang Tiku

Condoang nyo mato ka nan rancak

Di nan elok samo katuju

Kini buruang bao dek Santan

Kok taragak, ambo japuik pulo

Kok nak sanang bana paratian

Rancak ka nuri Santan tanyo

Ambo lah suko malapehan

Antah si nuri indak suko

Ma-alum Santan tantang itu.

Santan Batapih (129-13)

O...Aciak nan elok baso

Lai mah buliah nan di-angan

Nuri ndak patuik awak tanyo

Aciak dek alah malapehan

Tapi samantang pun baitu

Dek nuri buruang banyao

Buruak jo baiak dek ndak tantu

Barila-rila malah kito

Patuik dituka nak ambo tuka

Patuik dibali nak ambo bali

Kok mati buruang dalam sangka

Aciak nan indak ketek hati

Ba-a pikiran hati aciak

Dang Dami Sutan (130-13)

Mano kau Santan Batapih

Lah cipeh muncuang kau kironyo

Tasingguang hati nan pambangih

Lah wak den pulo nan kau ago

Kayo den pulo nan kau ajuak

Lah wak den pulo ka kau bali

Kapa tadoroang buduak masuak

Nankodo alah juo bali

Kok hanyo buruang nuri Bayan

Buruang denai pancari judu

Nuri denai pancari tunangan

Tagah si Santan nan ndak tau

Buruang diganggam rang Piaman

Lah sampai pasan nyo kamari

Pasan tibo dibao angin

Nan bana-banalah katoan

Jo sia Santan kamari

Kasurang raso tak mungkin

Santan Batapih (131-13)

Manolah aciak janyo ambo

O...Aciak Dang Dami Sutan

Salah koh garan mbo batanyo

Mangko lah berang balabiahan

Aciak tanyo ambo kamari

Jo Salamaik kami baduo

Sadang mananti lah tu kini

Etan dilabuah simpang tigo

Alah katarang tu dek aciak

Buruang Nuri (132-13)

Manolah uncu Dang Dami

Caliak lah somboang si Santan

Inyo manyuruak dinan rami

Jikok balinduang kapanasan

Dek uncu danga lah bana

Iyolah rundiang dari ambo

Inyo kamari jo Nan Tungga

Sampai disiko surang sajo

Tungga sahinggo simpang tigo

Duduak mananti ditapi labuah

Manuruik pandapek ambo

Nyato si Santan nan pangicuah

Dang Dami Sutan (133-13)

Diak kanduang si Buruang Nuri

Kalau baitu bunyi kato

Nak habih kilan dihati

Nak hilang kilau dimato

Adiak tabang lah kini juo

Ka jalan tigo basimpang

Japuik lah induak bako kito

Iyolah Tungga Magek Jabang

Adiak sugiro lah sakali.

Buruang Nuri (134-13)

Oh...oncu nan bijaksano

Bungo satangkai Koto Tanau

Kalau Nan Tungga uncu cinto

Bialah ambo nan ma-imbau

Tinggalah uncu jo si Santan

Ambo katabang hanyo lai

Kok lai elok ratak tangan

Untuang basuo kandak hati

Uncu oi tingga lah daulu

Hap ...Tah ...Tih ...

Gurindam Legaran 14

Kato putuih nuri lah tabang

Kalabuah basimpang tigo

Manjapuik rajo dari Tiku

Takajuik Tungga Magek Jabang

Mancaliak nuri nan lah tibo

Kandak bak raso kabalaku

Rundiang putuih Tungga bajalan

Payah jo latiah ndak takana

Naiak karumah nyo sakali

Sampai basuo bahadapan

Tabukak rundiang dek nan Tungga

Sadang ba-andai lah tu kini

Hap ...Tah ...Tih ...

Keterangan

Untuak manjapuik Nan Tungga, gurindam indak kito pakai, kato-katopun indak ado, untuak pindah ka Nan Tungga, kapado urang nan baduo, tatap barado dalam legaran, Santan Batapih jo Dang Dami, sabalun nan Tunnnga masuak, nan dijapuik dek buruang nuri, dianta-an sajo jo galomang silek, katiko anak randai alah duduak, tagak lah Nan Tungga Magek Jabang, nan di iriangan dek buruang nuri, masuak kadalam lingkaran, basuo jo urang nan baduo.

Anggun Nan Tungga (135-14)

Manolah Dang Dami Sutan

Nan bijak bakato-kato

Jawek salam pacik lah tangan

Salam rang jauah joloang tibo

Ambo lah eran dalam hati

Nuri manjapuik badan ambo

Toloang curaian dek Dang Dami

Ba-a koh asa jo mulonyo

Ambo mabuak bahati rusuah

Lah datang buruang nuri Bayan

Walau lun dapek ambo rangkuah

Lah raso di tapak tangan

Apo pikiran dek Dang Dami.

Dang Dami Sutan (136-14)

Salam di tuan nan ta-unjuak

Ambo jawek jo hati suko

Tangih ambo kok tuan pujuak

Labiah bak galang paramato

Nan wak angan siang jo malam

Nan wak cinto patang jo pagi

Kini Dang Dami lah mangganggam

Isuak nan Gondo panyudahi

Sabab ba-alah dek baitu

Di patang kalamari

Ayah alah ma-agiah tau

Baraso tuan ka kamari

Mandanga si Sapu Rantau

Ayah lah mabuak kiro-kiro

Saruan kampuang lah maimbau

Dek bunyi pusako lamo

Kaba nan sampai ka ayah

Rang ketek banamo tigo

Lai ketek si Jabang Sati

Lah gadang si Badurrahman

Nan bagala si Magek Jabang

Imbauan Anggun Nan Tungga

Kini nyo sawang lauik gadang

Nyo cubo manyonsoang ombak

Nyo lapeh si Nago Umbang

Mambari tau bakeh mamak

Baraso nan ketek alah gadang

Nyo cubo balaia jauah

Hati Dang Dami nak nyo sanang

Bari dek tuan kato sungguah

Anggun Nan Tungga (137-14)

Diak kanduang Dang Dami Sutan

Kalau baitu baritonyo

Cubolah  ba-a mamahaman

Ambo manyabuik nan taraso

Mangkonyo lauik ambo dugo

Namuah balaia jauah-jauah

Mancari kandak nan Gondo

Kandak saratuih duo puluah

Sabuah hanyo nan balun

Buruang nuri pandai bakato

Tapasah ambo ka Ruhun

Karumah mamak lah kironyo

Dari Santan dapek carito

Nan lai manaruah nuri Bayan

Iyolah adiak Dang Dami

Malang juo tibo di ambo

Di simpang ambo nyo tingga-an

Si Santan surang nan kamari

Sajak mulo ambo lah ragu

Kini lah baru dapek kaba

Dang Dami anak mamak ambo

Kok tau ambo sajak dulu

Indak kanamuah ambo tingga

Di jalan basimpang tigo

Alah kajaleh dek Dang Dami.

Santan Batapih (138-14)

Oh...tuan Anggun Nan Tungga

Usah lamo kito disiko

Buruang ndak namuah nyo manjua

To cari nan lain kagantinyo

Bunyi lah samo kito danga

Buruang nyo buruang pamenan

Bantuak urang baradaik bana

Dek buruang mangko batunangan

Kini baitu kabaiaknyo

Ayah lah nyato rang pamberang

Usah lamo kito disiko

Elok lah capek kito pulang

Apo pikiran hati tuan.

Dang Dami Sutan (139-14)

Tan Tungga si Badurahman

Kok hanyo Buruang Nuri ambo

Buruang ko bao lah dek tuan

Jinjiang dek tuan jo sangkanyo

Untuak pambao ka Piaman

Wak ruruik cincin di jari

Dukuah di lihia ditangga-an

Nan kamambuek sangka Nuri

Tukang nan alah ambo pasan

Supayo nak lapeh kandak hati

Tang Tungga rajo rang tiku

Nankodo dandang nan panjang

Tuang di siko lah daulu

Si Santan suruah lah nyo pulang

Anggun Nan Tungga (140-14)

Oh...Santan arif budiman

Rang mudo nan elok baso

Mandanga rundiang dari Santan

Rumik bado tibo diambo

Dang Dami jo Santan badunsanak

Samo ba ayah ka rang tiku

Ba induak bako ka Piaman

Bogo suku dapek di-asak

Jaleh sahino jo samalu

Tuah kasamo di japuik-an

Ambo ko tagak dinan tangguang

Sayang tacucua ka si Santan

Kasiah tatumpah ka Dang Dami

Karano nan domi lai ba buruang

Untuang ka inyo mbo sanda-an

Santan nan jan lai ketek hati

Dek si Santan janji lah mugkia

Lah lipua buek nan bakarang

Kok ka manih sahinggo bibia

Usah di harok buruang tabang

Santan babaliak lah daulu

Buruang Nuri (141-14)

Oh...uncu Dang Dami Sutan

Aciak Santan nan elok baso

Dek aciak cubo danga-an

Iyolah buah rundiang ambo

Tasabuik ambo kadijua

Tabincang ambo ka tagadai

Adaik bakato baitina

Dek si Santan indak tapakai

Kalau lah urang badunsanak

Ndak bantuak itu di caronyo

Santan aia Dang Dami minyak

Ciek tampek basisiah juo

Manolah aciak Dang Dami

Lai takana tu dek aciak

Takalo ambo kakamari

Taga suratan lai kabaiak

Kok dikana maso daulu

Ambo bamain di bubuangan

Rintang ma ngirai-ngirai bulu

Sambia ma-asah-asah paruah

Lah datang angin limbuhu

Talayok badan ka bawah

Tibo didakek batang pauah

Di mudiak kampuang Dang Dami

Agak lah samaso itu

Raso kasampai ajalullah

Ampia tabang nyawo jo sati

Dek ratak ambo nan elok

Lah datang Tumangguang Kayo

Lalu nyo baok mbo kamari

Karumah Dang Dami Sutan

Sakik disiko nyo ubek-i

Tawa disiko nyo ureh-an

Kok litak nasi lah tibo

Kok hauih aia lah

Sayang Dang Dami bakeh ambo

Alun tabaia bak barutang

Oi…Santan kanalah diri

Rang mudo baratak malang

Usah di niaik nak mambali

Santan babaliak malah pulang

Santan Batapih (142-14)

Oh...tuan Anggun Nan Tungga

Taga dek malang nan saketek

Bagian surau malang ambo

Sulik batenggang dinan suka

Apo katenggang biduak ketek

Lauik lah duo muaronyo

Nan nyo hati ambo bana

Dunia dikambang musim kini

Dek tuan kabek alah tangga

Di ambo babuhua mati

Ka kamari kito baduo

Kini kapulang ambo surang

Saketek indak wak manyangko

Ambo ka kalah digalanggang

Kini Tan Tungga nan lah bimbang

Mujua aciek Dang Dami Sutan

Bogoh kok indak sampai pulang

Antakan juo hinggo jalan

Anggun Nan Tungga (143-14)

Oi...gadih Santan Batapih

Kalau baitu buah andai

Indak ambo ma abih barih

Nan ma manitiak ambo tanai

Santan daulu malah pulang

Ambo kudian manuruti

Tanyo mamak kalau nyo datang

Ambo manenggang buruang nuri

Bijak lah Santan marundiangan

Sudi siasek koknyo tibo

Ilang nyawo baganti badan

Nuri ka ambo tenggang juo

Oh...Santan nan elok baso

Sumangek rumah nan gadang

Usah diarok badan ambo

Elok Santan babaliak pulang

Buruang Nuri (144-14)

Oh…uncu Dang Dami Sutan

Jo diri Santan Batapih

Dek uncu cubo danga-an

Ambo sabuik rundiang nan tarigih

Lah malang Santan Batapih

Iyo bana bak kato urang

Lah mabuak dek muluik manih

Badan digilo bayang-bayang

Sangko hati dapek nyo salang

Iyolah Buruang Nuri Bayan

Pamenan uncu ka nyo bao

Nasib si Santan nan lah malang

Lah mujua Dang Dami Sutan

Tungga lah tibo dirumahnyo

Oi…Santan sabalah dulu

Ulah pangicuah bahadapan

Nan domi lah dapek judu

Santan sahinggo ma-anta-an

Dek Santan uncu ka nyo kicuah

Inyo bapilin dibalakang

Usah disiko bahati rusuh

Gungguang tangih baolah pulang

Santan Batapih (145-14)

Oh...tuang Anggun Nan Tungga

Kalau bak cando kini nangko

Kabek sabalik koknyo tangga

Kasansai juo malah ambo

Malang nyo ambo punyo untuang

Sapantun jo gariang buto

Di hulu lukah rang tanam

Di baruah tingkalak lakek

Marapuang jariang takambang

Mambanam tubo rang lapeh

Jalo suto maide sisiak

Kamalah badan kamangadu

Kalau dipikia-pikia bana

Untuang sajoli jo bagian

Sanang bana hati tan Tungga

Tangih nan ambo tingadah-an

Tan Tungga nan baiak budi

Sadionyo tampek kasiah sayang

Ambang lah dunia jo Dang Dami

Santan babaliak malah pulang

Gurindam Panutuik

Kalau di andai caro itu

Aluran Santan jo Dang Dami

Niaik Dang Dami mungkin sampai

Manolah datuak jo pangulu

Barilah maaf badan kami

Carito sadang tabangkali

Si Santan lah bahampo tangan

Jatuah kadalam aia mato

Jo langkah gontai inyo pulang

Sadang kalamak diantian

Kudian kito ulang pulo

Talempong ma iriang dibalakang

Keterangan

Carito randai tabangkalai, kalau ditaruihan caritoko, aluran diri Dang Dami Sutan, jo diri Anggun Nan Tungga, Sampai duduak kapalaminan, salasai ijab jo kabua, antaro Tungga jo Dang Dami, indak bara tahun sudah itu, lahia lah anak pasanganko, banamo Mandugo ombak.

TAMAIK